大瀛喜日本料理 (已結業)

食過咁多間放題，呢間可以話係數一數二。今日遠離晚市嘅高朋滿座，幫襯午市放題！先講必食既刺身、海鮮：雖然係放題，但每款落單既都毫不吝嗇地厚切，三文魚比到接近腩位位置，魚油好重，入口柔軟。大赤蝦都係好厚肉好甜，北寄貝爽爽嫩嫩、帶子清甜，赤貝毫無腥味，總知真係樣樣都夠新鮮。炸物、燒物、小食既種類好多，揀到我眼花撩亂，特別喜歡芝麻雞翼，炸得皮脆肉質香口！另外居然有醉鮑魚，食落好鮮好甜，酒香唔重但有小小餘韻。醬燒開邊蝦唔會太咸，蝦肉都好易離殼，值得一試。另外天婦羅居然都炸得不油膩但係又好香口，西京比目魚又係推薦之一，香香甜甜嘅醬汁，加上滑嫩嘅魚肉，食到停唔到口～～飲品，甜品都好似係咁多間分店最多，全部細細地一份，唔怕食太多又可以試到唔同款式，自助吧仲有清酒飲添，叫返幾串燒物同天婦羅，真係滿足埋一眾酒鬼，最值得一讚既係完住無漏單，仲要上得又快又齊，全程食唔停口。