友鳥 (已結業)

今晚想食日本料理，经过见到这间食肆的易拉架，见到食物好似几吸引，于是入去试吓。一入到去，成间餐厅空无一人，晚饭时间都无人帮衬，心谂会唔会间餐厅唔多掂，但个心又想试吓，所以最终都决定选择「包场」。职员招呼唔错，未打开餐牌已经有餐前小食奉上。分别点了银鳕鱼西京烧定食、滑蛋吉列黑豚定食、烧白鳝串烧、鸡胸软骨串烧及玉子烧。首先银鳕鱼定食，鱼皮好香脆，而且鱼肉好滑，唔腥，同埋无雪藏味。而滑蛋吉列黑豚定食，啲蛋淋喺猪扒上面，但啲吉列皮都唔淋，仲脆，不过食落去就觉得同普通猪扒唔系太大分别，不过不失。至于串烧方面，烧白鳝几正，啲鱼肉有啲弹牙，同埋块皮几烟韧，而鸡胸软骨串烧好食，咬落去爽口，鸡肉又唔「鞋」，串烧值得推介。而份玉子烧就几大份，上枱时仲好热，有烟出，而且中间都几多鱼子。总括这间餐厅值得再帮衬。