Walter Bistro (智選假日酒店) (已結業)

新開期間做緊8折優惠，食物睇落都吸引決定試試。結果係期望愈大失望愈大，食物種類少，質素平平，勝價比低。一坐低每人送上半隻開邊龍蝦同燉湯，龍蝦幾多膏，肉質尚可都幾難切。燉湯係花膠雞湯，不過不失。先食海鮮，生蠔即開每人每次限3隻，因為閒日關係無乜人排。生蠔係愛爾蘭黎，幾細隻味道不過不失。長腳蟹唔錯，龍蝦鉗就煮得太熟，肉質好實。刺身主要有吞拿魚、三文魚、帶子，唔算新鮮但可接受，處理刺身既師傅刀工同刺身質素係Neway水平。處理刺身/生蠔既係同一人，雖然有戴手套但唔會換，而且每次出入開門都用戴手套隻手，衛生有待改善。網上見到有吞拿魚腩、海膽軍艦、佛跳牆、法國生蠔、movenpick雪糕通通唔見， 同實際好大落差。主菜叫左黑松露帶子意大利飯同南瓜汁油封鴨。前者唔錯，帶子大小同意大利飯質感適中。油封鴨肉唔嫩滑，可能油封時間不夠，鴨皮煎得尚算香脆而不油膩。甜品有不知名Gelato，味道一般。麵包布丁可配朱古力同雲呢拿醬，雲呢拿味唔出唔夠香。果撻同藍莓芝士蛋糕唔錯，撻皮香脆而味道甜度適中。總體黎講係無乜野好食，每樣都普普通通。晚市半自助餐8折後要$420，未折連加一$520，呢個質素唔值。