LE BREAD LAB (已結業)

去開尖沙咀，同朋友仔行左大半日，下午茶揀左間打卡一流既CAFÉ，講既就係LE BREAD LAB!位於尖沙咀美麗華廣場3樓。成間店以粉紅色為主題，好少女心!LE BREAD LAB為韓國過江龍人氣甜品店，店內除設有雲石枱、天鵝絨梳化等，仲有大大個心型霓虹燈，岩哂影相~主打水果奶油捲，設多款口味供選擇，各款奶油捲賣相都好吸引!飲品有咖啡、奶茶、特式牛奶等選擇。今日試左三款口味，包括：招牌草莓奶油捲、草莓巧克力奶油捲同鮮芒果奶油捲，同好友一齊SHARE，份量剛好。招牌草莓奶油捲大大粒士多啤梨好鮮甜面頭灑上適量糖霜，賣相相當精緻。外層奶油捲軟綿濕潤，內夾有厚厚一層忌廉，質感輕盈，口感幼滑，充滿濃郁奶香。草莓巧克力奶油捲面頭有大大粒香甜多汁既士多啤梨，外層奶油捲同內裡忌廉均為朱古力口味，香濃誘人，食落輕盈溫順，啖啖細膩甜美。鮮芒果奶油捲佈滿鮮甜芒果粒，奶油捲鬆軟綿密，配埋柔滑忌廉，口感豐富。LE BREAD LAB賣相精緻吸引，多款口味供選擇，無論同朋友分享、送禮定做散水餅同樣適合~