橫綱

坐落在公司附近既橫綱, 每次經過都見到大排長龍, 上一次同同事兩人去食, 等了半小時才入座, 再等20分鐘先有得食, 一個鐘頭食晏時間就冇哂. 今日一個人, 又早左偷走出黎, 好好彩等左10分鐘就有得入喇~

其實呢度真係幾唔好坐, 尤其係收銀後面既面壁位, 又窄又冇得"埃", 而且侍應姐姐又冇表情~ 不過話分兩頭, 呢度最貴都係$5X一碗麵, 而且又唔收加一, 其實都算係抵食架喇~

九州拉麵

因為早上已經吃過蛋既關係, 放棄了最愛既味玉拉麵, 而選擇了九州拉麵. 豬骨湯底既九州拉麵有三片叉燒, 粟米, 荷蘭豆, 筍, 海苔同幾條薑絲. 日式叉燒從來都唔係我果杯茶, 總係覺得同煲湯豬肉差不多, 不過呢度既叉燒都算幾鬆化又唔太肥, 但我最欣賞就係呢度既麵好有咬口, 好好o趙, 而且唔會因為浸得耐就淋左, 讚! 另外個豬骨湯底甜而不膩, o係呢個咁涷既天氣食完暖笠笠!