生記鮮魚湯米線 (已結業)

我記得第一次幫襯生記鮮魚湯米線，係食招牌豬腩肉魚湯米線。食完我基乎飽到行唔郁！第二次食魚腐米線，同樣好味兼吸引！今次，買外賣，睇吓會唔會因為減收 $3 而縮小份量！招牌豬腩肉魚湯米線 $28 ( 外賣 -$3 ) 一開蓋，魚湯好滿，差唔多倒潟！仲有 8 大塊豬腩肉， 問你怕未！豬腩肉嘅肥瘦比例均勻：肉佔3份之2，肥佔3份之1，切得薄一薄，俾人感覺唔會太餾！食落肉汁豐富、鹵水味夠入味、皮爽肉香，令人無法抗拒！我仲要成塊擺落口，滋味無窮！我記得堂食嘅魚湯米線上面有大量配菜，反而，外賣米線配菜喺底，只有些少椰菜、芽菜及木耳絲。食米線時，有魚蓉痴住，真係真材實料！米線係腍身，又未至於一夾就斷！不過，份量同樣唔少！魚湯加上肉汁鮮美，更加惹味！飲埋 9 成湯，太飽嘞！原來外賣及堂食，份量一樣咁多！實在好飽肚！