一君士多 (已結業)

唔知大家對鄧一君有咩印象呢？我細細個時有睇過佢嘅電視劇，但記憶都好模糊喇。今日就黎咗佢開嘅餐廳，一君士多食飯，雖然叫做士多，但其實賣嘅有車仔麵，日式咖哩飯，特色炸物等。當然順便希望睇下見唔見到鄧生或者俊男古天樂先生啦!鋪頭唔太大，但走日式簡約風，燈光明亮，坐得舒適。我地今日就叫咗霸王麵，有小鮑魚，花膠，廣島蠔，花菇，以前車仔麵係平民小食，呢個根本係豪華升級版，花膠炆得夠淋，食落覺得好滑同滋潤，廣島蠔煮得啱啱好唔會過老，好嫩滑，鮑魚仔細細粒, 過下口癮。另外仲叫咗幾個炸嘅小食，炸豬手，入味肉嫩，但要趁熱食，擺耐咗d油會標曬出黎。炸鵪𪂹蛋上面灑咗少少調味粉，簡單又好味個人同朋友覺得蘑菇雞翼唔太啱口味，似乎係用咗偏甜嘅cream cheese，如果用鹹嘅會好d。當然沒有遇上古先生, 但果然如雜誌所講, 遇到兩枱遊客呀!