今日黎咗莊士倫敦廣場嘅好味煌，上咗扶手電梯後要再搭lift先上到去，記住搭要行上樓梯嗰部喎，我就係因為搭錯而搭咗兩次……
店面非常光鮮新淨，應該開咗無幾耐，有卡位同圓枱，近窗位置望到街景，視野唔錯，佢地提供嘅湯底選擇亦非常多，市面比較少見，但因為兩人食只可擇一款，所以我地就揀咗清少少嘅泰國椰子雞鍋，湯底幾清香但味道唔算濃。
呢到食物分為寫單同自己出去攞嘅，肉品肥肉唔多，食落唔油膩，肉味亦幾好，魚肉片都幾新鮮，比較特別少少嘅係，佢地價錢唔算貴，但居然有象拔蚌片，花膠同海蝦任食，性價比算高。
飲品方面同外面嘅比, 大同小異，雪櫃夠凍，呢樣好重要，尤其係夏天打邊爐時，食一啖熱嘅食物，飲返啖凍野最正。
