掃qr code落單
⭐石燒濃厚豚骨魚介沾麵（溫+大盛300g）$98
粗身嘅手工拉麵，有得揀溫麵定冷麵，溫麵帶麥香，食落軟硬度適中，係我鐘意嘅麵質。
豚肉肥廋相間，口感軟腍，配菜有筍同苜蓿芽。
沾湯熱辣辣，魚味濃郁，食到好重柴魚味，湯汁比較鹹，拉麵同肉本身冇調味，所以浸落湯度食就啱啱好。
之前食過其他餐廳嘅沾麵，淡茂茂而且好油，但呢間嘅沾湯唔會太油，湯汁好掛麵好夠味。
試原味後，再滴檸檬汁🍋落湯，魚湯混合檸檬嘅酸味，開胃得黎又係另一番風味。
普通份量200g，大盛300g唔洗加錢，特盛400g加$5。
我女仔唔算大食，覺得大盛或特盛先夠飽肚，就算食300g，沾湯都仲會有剩。
⭐辛辣雞叉燒魚介拉麵（少油）$98
有兩塊雞叉燒，口感好滑好嫩，配菜有翠玉瓜同玉米筍。
拉麵一樣好彈牙，但冇得加麵。
湯底非常濃郁，唔算太辣，食得出七味粉嘅辣椒味，算幾重口味，所以冇點飲湯，我朋友覺得沾麵更值得一試。
兩款都係98蚊，價錢偏貴，唔包野飲，不過檯面有提供免費檸檬水。配菜亦唔多，除非另加$，我感覺食幾啖好快就剩返麵，越食味道會越單調，如配菜多少少會更好。
