愛上米線 (波斯富街) (已結業)

每次過嚟銅鑼灣, 見到呢間愛上米線都好多人幫襯, 今日終於都嚟食下午茶。店舖雖然唔算大, 但係座位都幾舒適。下午茶餐選擇都幾多, 又可以加錢追加小食。大大件蒜香炸豬扒麻辣湯米線炸豬扒真係幾大塊, 表面炸得香脆, 肉質又唔會嚡, 麻辣度適中, 好容易接受。米線爽滑彈牙, 份量都相當足夠, 還有芽菜, 雲耳同鮮腐竹, 真正好味又滿足。酸菜金菇肥牛泡飯酸辣湯底幾惹味, 紅綠辣椒切細粒, 肥牛都幾滑溜, 湯底配熱飯味道唔錯。追加雞翼尖和豬耳, 雞翼尖有肉, 都幾肥美, 豬耳麻辣得嚟又爽脆。呢度嘅招牌手打魚腐串都做得幾好味, 甜粟米, 櫻花蝦和冬陰功魚腐串味道各具特色, 以櫻花蝦味道最啱口味。話梅小番茄甜甜地都幾胃, 咪走雞炸得金黃香脆, 雞肉幾嫩滑。加埋凍檸茶餐飲, 呢餐下午茶豐富又抵食。