韓讚 (已結業)

突然之間想食韓國嘢，搵搵下Openrice見到銅鑼灣哩間做緊二人餐嘅優惠，就同個舊同學黎試試。二人套餐嘅份量好驚人！見唔見到相片裡面嘅部隊鍋係要開另一張檯擺！咁就等我講個部隊鍋先啦，非常足料，有芝士拉麵、午餐肉、香腸、泡菜、菇菌、高麗菜、脆肉瓜，材料就足夠啦，不過味道就冇想像中咁濃味，同一般嘅部隊鍋有d分別。主食方面仲有炒粉絲，可以配自選肉類，我地揀左牛肉，味道都唔錯。另一個近似主食嘅東東係餃子年糕湯，雖然表面上係湯，但係餃子同年糕嘅份量都好多，有如一個主食。加埋紫菜個湯都唔錯，如果少d年糕就更加好，事關都幾頂胃架！最後小食方面仲有一個炸雞，可以配自選醬，我地想清新一點所以揀左柚子醬。醬同炸雞係分開嘅，所以炸雞本身冇乜味道，好靠個醬料，柚子醬就好似平時沖柚子蜜個d，所以配上冇乜味嘅雞就差左d味道，有d怪，可能揀返辣醬或醬油會更配。套餐都跟兩杯飲品嘅，如果想要特飲就再加錢。整體還可以，每款韓國菜式樣樣都有，就只係樣樣都差少少味，唔係好到位，想食一餐多樣化韓國菜都ok嘅！