老媽拌麵 (屯門市廣場1期) (已結業)

老媽黑糖珍珠鮮奶賣相唔錯，白雪雪嘅鮮奶，杯內壁係黑糖向下流嘅痕跡，底層係珍珠，層次分明。黑糖味香甜，完全蓋過奶味，珍珠煙韌Q彈。百頁豆腐鹵得好入味甘香，好似茶葉蛋咁嘅味，豆腐有嚼口得嚟又唔會老。台灣香腸未食已經聞到香味，外皮炸到好香脆，肉質均勻，肥肉適中，油潤juicy，香甜可口。高麗菜豬肉水餃水餃皮都算爽滑，肉餡略嫌鞋味小小，但加咗高麗菜，爽甜清新，肉餡都多汁，蘸醋食都幾好味。豆乳香香雞飯炸雞外皮酥脆香口，肉質嫩滑juicy，味道略為淡咗小小。珍珠米飯煙韌，腐乳先係點睛之作，可能已經太耐無食過腐乳，撈埋啲飯一齊食，果種鹹香味真係超惹味。