首先上碟餐前小食，係花生黎架。
燒味拼盤 (例)
燒味拼盤有四款燒味，分別係燒腩仔，叉燒，豉油切雞同香辣海蜇，每款大概六件。個人特別鍾意脆皮燒腩仔，肥瘦相間。叉燒係暖嘅，好瘦。海蜤香脆開胃。
豐料老火湯 (例)
豐料老火湯係木瓜雪耳，用一個大鍋上，足有六碗湯飲。個湯真材實料，雪耳主載左個湯，令個湯飲落好厚身好潤。雪耳同木瓜都煲到腍哂，木瓜又腍又甜。其他湯料有豬骨，花生，南北杏，連湯料都可以食埋。
涼瓜肉鬆煎蛋角 (例)
煎蛋角有四大塊，熱辣辣煎起。涼瓜香脆唔苦，肉鬆健康唔鹹，份量唔少，蛋角食落唔油，都夠滑。整體唔錯。
脆皮咕嚕肉 (例)
咕嚕肉足有十大舊，真係皮薄脆肉又嫩口，好好味。個汁甜甜酸酸，好開胃。其他配料有好多菠蘿同青紅甜椒。
招牌白胡椒蟹
上次喺另一分店食過呢味招牌白胡椒蟹 ，今次要encore! 成隻巨蟹用鐵板上，蟹未到聲先到，上枱後，經理將d汁㨆上面，香氣四溢，烽煙四起！隻蟹好多肉，肉質鮮甜多汁，蟹殼都超脆，食得出係新鮮，蟹膏都有。白胡椒汁香而唔過辣，唔會完全蓋過蟹味，味道啱啱好。服務員提供左每人一對膠手套同濕紙巾，夠哂貼心。
黃金海皇炒飯 (例)
黃金海皇炒飯足有六碗，白飯同蝦粒，翠玉瓜粒，蔥花，鹹蛋黃一齊炒，好香鹹蛋黃味。飯炒得好乾身，粒粒分明，口感煙煙韌韌，幾好。
精選甜品
精選甜品係陳皮紅豆沙。陳皮好香，紅豆沙煲到起哂沙但係仲有d紅豆有得咬，為呢餐劃上一個完美嘅句號。
兩個人清哂所有嘢，肚皮同舌頭都好飽。
