DK1885 (已結業)

晚上想同男朋友撐枱腳，就畀我搵到間隱世越南菜。 呢間越南菜裝修好靚好時尚，同出面其他嘅越南菜裝修好唔同。而且坐位闊落。 我哋叫咗個海防手工墨魚餅同香草野菜燒牛柳沙律做前菜，墨魚餅好有口感淡淡肉。牛柳沙律牛柳好嫩口唔會乾爭爭，配合沙律一齊食好開胃。之後嚟咗一個香茅魚露煮活蜆。 賣相好吸引而啲蜆好入味，如果大家鍾意嘅可以連埋香茅一齊食， 口感層次咁就再豐富。之後仲叫咗一個海防蟹肉湯金邊粉， 粉入面有好多蟹膏蟹粉，食落唔會口淡淡。 而且金邊粉好特別唔知係咪廚師自己整，口感有啲似刀削麵，如果係蟹控嘅一定要試！最後叫埋個青檸梳打同北越咸檸吉仔水做飲品， 確係清新。食完成餐覺得呢度都好足料而且座位好舒適， 如果仲頭痕緊同女朋友去邊度食飯，極之推介DK1885。