花臣車仔麵 (已結業)

因為推廣$20有3餸，所以今日同同事嚟試。見到點餐紙好多款式餸菜選擇，睇落唔錯咁，但正價價錢有啲貴，正價3餸一麵大約近$40或以上，當然如果貴少少但質素唔錯既當然接受啦。今次$20推廣指定於$12、$10、$8 三項餸各選其一再配一款粉麵，我叫咗碗油麵+通菜+墨汁墨魚餅+雞翼尖跟麻辣湯，我同事叫咗南乳豬手+腐皮墨魚條+通菜，我倆互相請大家食沒有叫既餸。我個麻辣湯底唔太咸，亦冇乜味，只有麻辣既味道，佢真係麻到咀唇爆波既感覺，可是個湯冇味。利申先，我平時食嘢唔鍾意太咸同飲嘢盡量走甜。墨汁墨魚餅係ok好食既，雞翼尖醃得唔夠味，色就有啦，相比雲貴X米線個翼尖，佢只係醃得5成味道，南乳豬手...唔知啲南乳去在邊，隻豬手基本輕輕醃過既，大約2成到啦，食落去好有白烚既感覺，未食過咁差既豬手，腐皮墨魚條較實，以為食緊普通腐皮春卷實心版，唔覺自己食緊墨魚條，油麵份量...普通一個節食女仔會食得飽，我15:00食17:00好肚餓啦。環境一般地方唔大，地面嗰層3張圓枱x4個座位都少少迫，樓上有幾多張枱就唔知啦。如果以呢個食物質素，佢收呢個價錢差唔多既，如要收正價，食物味道應該搵多啲人嚟比意見改善下。