春暖花開笑迎春
全素頭盤，頭盤主要都係幫食客開胃，所以都係酸為主，比較特別係一款用鮮淮山混合左芒果汁，好有新鮮感，鮮淮山真係第一次試，有驚喜，另外金梅涼瓜爽，都算幾酸，但酸之中又帶少少甘，都算係近期之中最特別嘅頭盤。
飛雪藍莓黑豚肉
賣相係類似糖醋排骨，但係一來係用黑豚肉，二來係用藍梅汁，所以個味有啲唔同，黑豚肉唔算肥，唔駛擔心好似食肥膏咁，味道都有驚喜，相信係藍梅汁帶出左啲肉味，唔錯！少少糖霜營造左飛雪效果，主要都係為左賣相，唔會令道菜好甜，值得一提係每一件黑豚肉大小形狀都好接近，大啖少少都可以一啖一件，都幾細心，好高水準！
龍皇野菌飛鴿圃
非常好食有驚喜ge一個菜，因為好好食，我就好仔細咁睇真啲裡面係用咩整，首先佢係用起骨起肉再絞碎，仲撈左少少蝦膠，再釀返入隻鴿再炸，鐘意啖啖肉嘅朋友一定會好鐘意，因為乳鴿好多人鐘意食，但係就唔係咁多人鐘意佢有骨，呢道菜就冇晒煩惱，係好得，味道比普通乳鴿重少少，口感就大幅提升左，要推介！
濃湯竹笙花膠素翅
未上枱嘅時候以為係一煲咁上，原來係一道菜，賣相好靚成個圓型 (有啲可愛feel)，竹笙模釀花膠絲素翅蟹肉 濃湯底味好夠，一啖入面有湯有花膠有蟹肉素翅，口感幾好，唔知點解食落有好grand嘅感受，幾有趣，係特別嘅！
呢餐真係幾滿足，一來啲野好食，二來係呢個價錢但每道菜都好有心機整，值！
