瑞記咖啡

营业中

休息中

唔係朋友介紹都唔知，瑞記咖啡係位於街市3樓既熟食中心既一間鋪仔，係呢度完全感受到八十年代最Local個種既飲食文化。雖然都係位於中上環，但好明顯呢度都係行貼地路線，所以見到著西裝既OL OB就感覺佢地同呢度格格不入。而一睇餐牌，價錢比起出邊行文青風格既Cafe要便宜好多。知道呢度出名蛋牛包，都唔使點猶疑，即刻Order左一份蛋牛包。以雞蛋撈埋免治牛再煎香形成蛋餅，香酥惹味。連個麵包都加熱過，咬落去好軟綿綿但D包邊香脆可口。所以一口咬落去先係會經歷一層鬆脆，再經過香軟，最後咬到香香鹹鹹既蛋餅，形成三重口感。西多士，麵包浸滿蛋液再煎至金黃，包邊微微焦脆。淋上一層煉奶，香中帶甜。Order左支樽仔奶茶，凍奶茶茶味奶味適中，稍微甜了一點，但都好好飲。至少唔使去蘭芳園度排隊等飲一杯奶茶，仲可以慢慢嘆。呢個數食中心其實都係好簡單既粥粉麵飯，價錢唔貴，味道唔錯，但更多食既係一種記憶，屬於香港人既貼地文化。