前一日我預先book左位，所以去到我地就即刻有位坐。餐廳嘅設計，先有普通嘅日式bar枱同普通枱。行入少少就有呈半圓型嘅鐵板燒枱，並有座位圍住。同長形嘅日式bar枱相比截然不同，鵝蛋型枱令客人坐得親密，但唔會有迫嘅感覺。餐廳放置左好多特別嘅日本小擺設，而餐具都係用日式嘅，好精緻，令到成間餐廳都充滿日本風。:)
坐低之後，師傅推介龍蝦二人套餐，佢話今日龍蝦靚，其他主菜有和牛、銀鱈魚、炒飯、炒菜等。
先食前菜，質素可以平平。跟住就食主菜龍蝦。龍蝦未煮之前，師傅先比我地睇下，隻龍蝦色澤唔錯。煮完上碟。龍蝦賣相吸引，多肉而鮮甜可口。有別於其他龍蝦菜式，佢有一種特別嘅味道，係我同都未食過。一問之下，原來師傅特別加入海膽汁，味道更有層次。食完，奇怪嘅事就發生啦
，我地食完嘅龍蝦殼就即刻收走曬。我問點解，師傅話要黎整個湯。
之後嘅銀鱈魚，都幾有鮮味。至於和牛，我地揀左薄燒。我地兩個其實好鍾意食牛。塊和牛未煮之前，我地有睇過，睇到塊牛脂肪比例好平均，真系一等一靚牛肉。師傅在鐵板上拉一拉，再卷葱花，加埋燒雜菜就上碟。食落和牛肉質好嫩，同時因為師傅獨家調配嘅香草酱，味道更為豐富。
到個湯，係個龍蝦湯黎。向來我以為殼應唔會有味。但飲落，好鮮甜，龍蝦味都重。至於，炒飯同炒菜，質素可以接受。最後，以綠茶雪糕做甜品作終結。
今次真係食得好滿足。唔係因為夠飽，而係因為夠好食，而且環境夠舒服。我會記住您，铁人旨花﹗之後會定期到﹗
