丼瀛 (已結業)

觀塘區越來越多好嘢食，今次朋友介紹我去食嘅呢間日本餐廳，位置比較隔涉，地鐵站行過去都要7分鐘左右，雖然係咁不過餐廳質素唔錯，值得支持嘅。香芒三文魚紙米卷芒果好甜好新鮮，大大嚿芒果襯托出三文魚嘅鮮甜味。三文魚好新鮮，紙米卷好夠薄。入口口感彈牙，唔會太軔。築地壽司杯7杯細細杯好似Vodka shot嘅係呢到比較特別嘅菜式，個杯裡面都有啲壽司飯配合唔同嘅刺身類，最鍾意蝦杯，大蝦肉質好爽口，蝦味濃郁但唔會腥。海膽杯都唔錯，海膽味濃郁，份量都唔算好少。松葉蟹肉冷豆腐配上特制醬汁酸酸地好開胃，豆腐好滑溜，淡淡豆味同海水味濃嘅松葉蟹肉好配搭。凍食好開胃，夏天消暑一流。流心粟米餅新鮮即炸熱辣辣上枱，外皮炸得好脆，咬開裡面粟米流心小心辣親。