Little Tipsy Restaurant & Bar (已結業)

今日約咗舊同事喺觀塘食飯，佢揀咗呢間係王子大廈嘅Little Tipsy。佢話環境唔錯，坐得舒服，而且食物質素有返咁上下。既然地頭蟲咁講，就一於去試試。餐廳格局時尚雅緻，座位與座位之間夠寬敞，可以舒舒服服坐低歎個lunch。Set Lunch有九款選擇，價錢約$100 - $150左右。我揀嘅係烤羊架，要七成熟，而同事就揀咗慢煮肉眼扒，五成熟。麵包外脆內裡煙韌，配上清清甜甜嘅洋蔥湯，味道不錯。主菜隨後上枱，賣相相當不俗。羊架配嘅係香烤薯仔同時令蔬菜，肉質相當嫩滑，夠羊味之餘又唔會太羶，配埋佢哋嘅自製醬汁，美味，讚！慢煮肉眼扒配嘅係香烤薯仔同田園沙律，五成熟啱啱好，外層略略煎過表面帶香脆，而慢煮方式，又可以保持肉質嫩滑，加埋個醬汁，滋味異常。而跟主菜嘅薯仔、時菜同沙律，都食得出係優質貨色。跟餐叫嘅飲品係咖啡同奶茶，維持一般水準。從食物質素就睇到大廚嘅烹調技術有番咁上下，火候掌控出色。食材亦都有用心挑選，唔會將貨就價，唔係下下賺到你盡，算係一間有心嘅食肆。而家百零蚊食過晏，話平唔平，話貴唔貴，但呢度無論環境、食物同服務，都有相當水準，我覺得值得支持。