La Pizza Express (已結業)

喺觀塘海濱公園附近有間薄餅外賣小店La Pizza Express。本身諗住可以喺海濱公園野餐食Pizza，買完先落雨，唯有拎返屋企食。呢次叫咗素牛肉芝士薄餅，牛仔腸，藜麥毛茄沙律。薄餅採用薄批餅底，但仍然有咬口，唔會太薄身，而薄餅嘅醬汁味道得宜，素牛肉肉醬真係好似食緊真嘅肉醬，味道真係好有肉味，令人好有驚喜。而牛仔腸有啲德國白肉腸咁，佢哋嘅份量都幾多，仲有沙律作配菜，可以加埋一齊食。最後藜麥毛茄沙律入面除咗有藜麥毛茄之外，仲有清新無比嘅秋葵。令到呢份沙律健康度提昇更多。除咗食物之外佢哋仲有不同嘅手工啤同埋果味汽酒。好似我哋叫咗手工啤嘅大圍啤，仲有Berry味嘅Mimosa。