Little Mario's Pizzeria (綠景NEO) (已結業)

最近天氣開始涼快，去海傍散散步終於唔再係受罪，而係enjoyment。呢一日就喺西灣河搭渡輪過來觀塘海濱行下，放鬆下心情。而家觀塘海濱長廊有啲幾有特色嘅裝飾，係散步慢跑嘅好地方。行到咁上下都有啲餓，就同女朋友即刻上黎openrice睇下附近有咩餐廳選擇。最後我地選擇左呢間位於綠景NEO嘅西餐廳「Little Mario」試下。餐廳鋪頭唔算好大，但裝修有啲外國小餐廳嘅感覺，幾chill。店員主要係講英文嘅，服務都幾熱情，所以有啲去左外國嘅感覺！餐廳主打pizza、pasta等西餐，但其他小食、沙綠等選擇亦頗多。俾大家睇下menu～前菜我地叫做個雞肉凱撒沙律。沙律菜好新鮮，加埋啲醬雖然好邪惡，但真係幾好食。如果大家唔想咁多醬，可能要提早同店員講。Pizza方面我地叫左個肉食獸Pizza。叫得做食肉獸，當然好多肉啦。而佢地啲芝士好滑，配合啲配料食幾正！Pasta我地叫左一個黑松露手工意粉：意粉好彈牙好掛汁，而黑松露雖然唔係好多，但都幾香！咖啡我叫左杯flatwhite，但呢度似乎無拉花嘅。不過唔緊要啦，飲落去都唔錯。總結，呢度食物同環境都幾好，喺觀塘海濱散完步不妨來試試！