漁吉海鮮丼專門店 (已結業)

今晚要OT又落雨，唔想行太遠就即刻上網揾下附近仲有咩外賣返公司食，揾到毅力樓上有間隱世💛日式丼飯舖。漁吉有12款魚生飯揀，其中招牌嘅係龍王丸同蟹王丼，前者係有原隻龍蝦🦞勁吸引！所有丼飯都係即叫即製，要預少少時間，不過店員都超有效率，十分鐘左右就可以取餐。漁吉特選丼（$188）漁吉嘅丼飯真係好足料，呢款特選丼配料超豐富，有三文魚、油甘魚、鰻魚、海膽帆立貝、三文魚籽、櫻花魷魚、赤蝦、左口魚邊，其中大大粒嘅帆立貝中間夾住海膽，表面有少少火炙焦香，食落鮮甜，超滿足！另外櫻花魷魚都好有驚喜，鮮甜爽口，好適合加埋蟹籽撈壽司飯食。北海帆立海老丼（$168）除左有厚切帆立貝，仲有三款蝦，包括牡丹蝦、赤蝦同甜蝦，鮮甜啱晒鐘意食蝦嘅朋友，完全唔點豉油食都得！玉子燒好甜，好有日本風味！總括嚟講，漁吉丼飯嘅用料幾新鮮，外賣質素都唔錯，如果行開呢邊可以上嚟幫襯，我下次要再食龍王丸！