頂好原味道1990 (中海日升中心) (已結業)

今晚喺觀塘食咗一間新開嘅台灣菜，望真啲原來係之前喺中環見過人氣非常高嘅台灣餐廳，菜單選擇非常之多，望真啲原來餐廳係台灣老字號，朋友話喺台灣都好多人介紹呢個餐廳。佢仲寫住餐廳用嘅滷水汁同辣椒油都係由台灣飛機直送，咁當然要試吓啦！我哋叫咗個二人套餐，包括有綜合拼盤，入面有甜不辣、豬耳、雞翼、黑輪、百葉豆腐、滷蛋，啱晒朋友鍾意食好多唔同款式嘅小食，但又唔使逐樣小食單點咁多份量。另外套餐仲有手工香腸拼鹽酥雞，肉燥青菜，肉燥飯兩份，如果唔想食飯嘅朋友可以免費轉烏龍麵、關廟麵、王子麵或者蒸煮麵。呢間餐廳嘅滷水汁果然不同凡響，非常入味之餘，味道仲同平時食開嘅台灣餐廳滷水汁唔同，真係超好食！食得出所有材料都好有台灣嘅風味，感覺好似喺台灣夜市掃緊街咁添！個人就最推介綜合拼盤，份量唔少之餘仲可以試到好多款式。我哋仲另外叫多咗一款小食，就係鹽酥綜合線蔬，入面有香菇、杏鮑菇、青花椰菜、西蘭花同高麗菜。平時唔會特登食蔬菜嘅我都忍唔住食晒成分小食,因為真係好惹味!二人套餐仲包兩杯餐飲,我同朋友分別揀咗烏龍鮮奶同埋珍珠鮮奶茶,值得一提嘅係佢哋嘅餐飲係用春陽茶事呢個品牌，而家唔使喺外帶店都可以飲到佢哋嘅珍珠奶茶啦！