嵐川日本串燒 (已結業)

如果不是朋友的推介，都絕對找不到這裡。原本同個朋友吃午飯，但佢臨時甩底，就在附近找地方吃飯，佢推介呢度，話食物都唔錯的。坦白講，沒大意欲幫襯本地人經營的日本料理店，但見價錢唔貴而附近又無咩選擇，就來試下。一時許，意外地人客也不少。內裡裝修以深色木為主，好有居酒屋的格調。但牆上寫著的選擇不太多，應該是以串燒為主的店子。午餐得幾款選擇，就選了紫蘇豬肉定食。為了試下串燒得唔得，又叫了一串燒雞翼。先來味噌湯，不過鹹，都算幾有鮮味，除了豆腐粒，亦有幾顆蜆肉在內，交足功課；串燒有三串，套餐跟的腸仔味道一般，是現成貨，情有可原。燒雞翼是雙飛的拆了骨，吃得方便。用鹽燒得香口，都有水準，好味。另外還送了一串燒冬菇，也不差；紫蘇豬肉用了半肥廋的豬肉，肉質有點韌，但起碼沒有給化學劑「招呼」過，個人而言都覺得幾好。真的有幾香的紫蘇葉的味道，加上燒汁，很快便吃完碗飯。店員全是本地人，禮貌好好，招呼不錯，值得一讚。埋單55蚊，不算貴，如要在同區吃日本東西的話，這裡都食得過。問過呢度夜晚收十二點，可以下次同老友收工來吃串燒。