IJ Kitchen (已結業)

觀塘又有新餐廳開喇，今日就趁機會同朋友放咗工黎試吓。餐廳環境唔算好大，人手亦都唔多。但正正係因為咁，更加有家庭式經營個種親切味道，老闆好友善咁介紹食物。餐牌嘅選擇亦都唔算好多，但貴精不貴多嘛。今次我哋就要左老闆推介嘅餐廳signature，蟹肉西班牙紅蝦汁意粉。呢個意粉真心好好食！雖然汁同配料完全唔多，但食落非常濃嘅蝦味。知道老闆用咗好多西班牙紅蝦嘅蝦頭蝦殼去熬製呢個汁，完全食得出嗰種濃郁。而且蟹肉嘅份量都好足夠，基本上每啖都會食到一絲絲嘅蟹肉，味道好鮮。而且意粉亦都好煙韌唔會好淋，有咬口。除咗意粉之外，西班牙紅蝦仲可以用來做烏冬嘅湯底。完全係另一個食法，但同時亦都再次感受到紅蝦嘅鮮甜。今次仲加咗少少蕃茄，食落味道更有層次。烏冬嘅配料可以有三個選擇，分別係西班牙豬腩，安格斯肥牛同海鮮。我哋就揀咗安格斯肥牛，脂肪唔算好多，唔會好肥膩，但食落亦唔會好韌之餘，牛肉味非常濃，係有質素嘅牛肉。烏冬亦好滑，一面食，一面將全部湯飲晒！最後再配埋呢杯唔太甜好清新嘅葡萄柚綠茶，感覺滿足。