沁沁麫 (已結業)

西灣河有質素嘅麵店不少，繼太安樓林記車仔麵，呢間沁沁麵都係值得推介嘅小麵店。一入門口，見到鋪面細但係幾整潔。座位唔逼，都算鬆動。麵店嘅招牌菜沁沁麵係人參雞湯麵，但係老闆同時都推介研發左半年嘅喇沙。我最後從善如流，叫左喇沙麵同羅漢果茶（都係老闆極力推薦）。呢度喇沙麵好食有兩個原因。第一，湯底比唔少店鋪濃味。坊間有唔少餐廳煮喇沙，但係大部分椰汁味太重，蓋過應有嘅酸辣味同香味。呢間嘅湯味道平衡，酸辣香同椰香兼備，而且唔嗆喉，也唔會太鹹。第二就係麵十分吸汁。湯麵兩者，缺一不可。呢個麵比其他鋪頭嘅麵更吸汁，令到每一啖麵，都食到滿滿嘅喇沙味。好湯頭同麵能夠融合，就係一碗好湯麵嘅象徵。羅漢果茶清甜潤喉，夏天的話飲凍羅漢果茶，更加能夠解渴。所以如果黎西灣河的話，不妨順道黎試下呢間用心嘅小店。