紅蔥頭

营业中

休息中

其實真喺好耐都無行過西九龍中心，大多時都喺直衝上頂樓美食廣場，但原來喱到有間臥虎藏龍嘅港式西餐。之前喺鑽石山返工，記得嗰邊都有間紅蔥頭，lunch成日過去食，因為真係好有人情味，通常都會有啲打工仔午餐，價錢經濟實惠性價比較高。嚟到呢一度喺門口就見到有好多返工人士同穿着校服嘅學生優惠，其實呢啲特別優惠係香港真係買少見少，突然覺得返返去想當年做學生嘅時候，特登搵啲學生餐。見到咁有港式風味，今晚一於試吓佢嘅鐵板餐，分別叫咗西冷同肉眼，都叫咗三成熟，果然鐵板就一定要生啲唔好太熟，上檯吱吱喳喳多幾嘢都變咗五成。肉質都好鮮嫩，纜對唔馬虎。餐飲轉咗特飲：紅茶香茅七喜&七喜雲呢拿雪糕，轉特飲每杯加$18。成個套餐大概$200左右，有齊餐湯蒜蓉包飲品再加鐵板，基本上係港式操作。環境的確係好過樓上美食廣場好多，坐得舒服，又可以慢慢食，同埋以前食開到而家，都仍然keep到港式風味西餐嘅水準，的而且確係唔錯。