Ocio (積存街) (已結業)

啱啱琴日打完風，今日諗住放工食個靚cafe繼續holiday mode。今次就嚟到大圍嘅「Ocio」（Dinner set 7）奧斯芝士和牛漢堡估唔到喺大圍都食到好好食嘅漢堡。牛肉漢堡內層好幼嫩多汁水，外層煎香有牛肉嘅咬口感，內層啱啱好熟夠細嫩，好似食緊越式生熟牛pho咁。見醬汁小，但咬落居然爆晒汁，仲滴晒枱。牛肉嘅牛油味好香，靚嘅和牛肉真喺唔同d。薯條都好有驚喜，因為食得出好新鮮。口感唔喺雪藏薯仔嘅粉口，而喺有脆口感。所以食落油膩感好小。焦糖香蕉朱古力窩夫呢碟喺稱職嘅窩夫，因為份量夠，窩夫夠厚實。香蕉味好香，加埋雪糕一齊食，就會好好食。雖然無太驚喜嘅位，但喺絕對穩打穩紮唔會差。見到而家有個（期間限定）奧斯芝士焗龍蝦熱香餅早餐，心郁郁想試下。反正大圍交通方便，過2日過嚟試下個早餐先。