壽司豐 (已結業)

周年紀念一定要搵好嘢食，為應付嘴刁嘅另一半，今次揀咗廚師發辦！食廚師發辦，就係相信師傅跟最好最新鮮嘅食材呈現俾客人，而位於漆咸道南嘅呢間店嘅Michael師傳就絕對可以信賴。先有鱆紅魚刺身，帶點柚子味道， 加上酸汁同辣蘿蔔蓉，清香帶點酸，好開胃。跟著師傅表現即開象拔蚌， 食果陣象拔蚌還在動，點少少蒙古岩鹽食更鮮爽彈牙。北海道石卷蠔，好大隻，併埋去俾手掌仲要大！ 清甜多汁，海水味唔重！吞拿鱼水鮫位，入口一咬，豐富嘅魚油走哂出來！口感嫩滑，我覺得係最好食既部份。赤貝壽司，師父揑好一拍落去赤背會慢慢彈返起來，好似仲生既一樣。海膽壽司， 與其話係壽司，我覺得似飯團多一點，用極脆口嘅紫菜包著，呢款海膽係我食過最甜嘅，入口滑溜，感覺係清澈有鮮甜！最後仲有款魚湯同埋朱古力雪糕，食完真係大滿足，無揀錯地方。廚師發辦除咗講求食材新鮮之外，廚師對食客嘅反應亦都要好敏銳，除咗講解食材之外，亦要懂得與客人互動。今次見識到Michael師傅除咗可以同客人談天說地之外，對喜歡靜靜地享用食物嘅客人，亦給予私人空間，準備好食物之後客人沒有特別就會默默準備下一道菜，實在專業又細心！