豬屋日本料理

营业中

休息中

今日放工好攰，唔想返屋企煮正諗緊食咩好，咁啱經過呢間豬屋日本料理，比個咁可愛既門口吸引，就決定入去食。好難得唔係商場舖都有咁大同咁靚既門面。入到去，果然係好街坊既感覺，舖細細，但唔會比人有壓迫感既感覺。都係QR code落單，比想像中多種類選擇。佢叫得豬屋，就更係要試佢既炸豬排丼架啦。呢個福岡便當真係好大份，有超大塊吉列豬排，長過隻匙更; 豬軟骨;日式圓蔥魚餅; 螺肉; 咖喱飯。吉列豬排睇落冇咩特別，但食落冇咩肥肉，炸粉薄得黎好脆口，而且豬排一咬即爛，好軟稔。本身有跟沙律醬，但呢塊豬排我覺得點咖喱最好味，仲有佢既咖喱係偏甜好少辣，真係好日式。豬軟骨都好入味稔甜，送飯一流。圓蔥魚餅，黎到一睇就明，好足料。鹽燒油甘魚鮫食到停唔到口。 新鮮即煎煮，好脆口入面魚肉亦好嫩滑，好明顯材料好好。燒菠蘿實在太吸引，食落更驚喜，燒過但肉汁奇多。本來係當甜品食，所以留到最後食，竟然仲幾熱下，多汁到每啖都好似飲果汁咁。呢餐真係食得好滿足。