岩石牛扒屋 (已結業)

下晝探完朋友，朋友帶左我去佢屋企附近既石燒牛小店食晚飯。扒類晚餐黎講都唔算貴，套餐都係148蚊起，包湯，沙律，前菜，扒同飲品。唔想食扒既都可以揀其他常見啲既主食，138蚊起。餐湯好得意，我本來以為係普通忌廉湯，但入面有好多鷹咀豆，啲湯入口都覺得好似好多豆蓉咁，幾特別，我幾鐘意。沙律正常發揮，蘋果同菜都新鮮。前菜既生蝦好新鮮，爽口彈牙，個汁酸酸辣辣咁，好好食。鮮蝦既肉都彈牙，碟邊有啲辣粉，加埋一齊幾好食。兩隻青口雖然細細粒，但係有啲咸味，令到唔鐘意食青口既我都覺得易入口。西冷肉質比較細嫩，雖然廚師重手左，煮得熟左少少先上枱，但係唔會覺得鞋。而且有適當份量既肥膏痴住邊位，燒到好香口！牛柳係正正方方一大舊咁，佢既肉味比西冷更濃，同樣地燒出黎唔會鞋口，加少少玫瑰鹽已經好好食。呢個本身入面比較生，可以自己慢慢燒，控制佢既熟度，所以今次我比較鐘意呢個牛柳。強烈建議上枱之後要快手食左啲菜先。。。唔係燒到最尾會燶哂，浪費左。。。薯角反而可以慢慢擺。