阿來東南亞風味 (已結業)

今日行到廣華街，見到【阿來東南亞風味】，其實之前已經經過好多次，但由於「其貎不揚」以為只係普通茶記，所以冇食過，原來佢係主打泰菜，價錢仲好街坊價，一於試吓~【馬來肉骨茶】馬來西亞式嘅肉骨茶，特點係藥材味濃郁。 原本係有肉骨同鳳爪，不過可能太好賣得返肉骨。湯底肉香味甘香味平衡，肉骨新鮮，最近天氣轉涼，食肉骨茶暖笠笠滋補吓就啱晒。【香茅鹽燒鰂魚】切開魚皮已經冒出香噴噴嘅煙，魚肉滑捋捋，塞咗香茅、檸檬葉去燒，香味滲晒落魚肉，有鹽嘅鹹香亦保持魚鮮味，正～【阿來海南雞飯】加$10轉咗雞脾，拆咗骨，啖啖嫩滑雞肉。有兩種醬汁蘸，蔥油惹味之餘又帶出雞嘅鮮味，自製海南雞醬就辣辣哋更有泰式風味。+$21轉咗原價$35嘅【椰青】，味道清甜，陣陣涼爽椰香味，雖然秋意漸濃但依然令我感覺好似喺泰國沐浴於陽光海灘之中～疫情關係，餐廳唔係喺旺區，周圍仲有啲僻靜添，但餐廳都有大半食客，而且keep住有食客攞外賣，仲有啲係熟客嚟，平靚正嘅街坊生意實有捧場客嘅～