黃金燒味 (已結業)

今日行完書展,想係附近食下燒味,見到地鐵站附近有依間新開嘅店,就過黎試下。餐廳碟頭飯嘅價錢唔會話好貴,而且仲有好多選擇,㨂左一陣先決定好食咩。嗌左一碟叉燒飯加咸蛋,一上枱,哇左一聲,份量好大,不論飯定係叉燒,一定食得滿足同飽,叉燒係瘦嘅比較多,想食肥嘅可以加5蚊叫肥膿腩叉,但女仕同我一樣想食健康啲,可以就咁叫叉燒,味道水準都唔錯,有幾件燶邊都好食,咬落唔會好鞋好難咬,可惜有幾件斬得有啲碎,但見到可能係學徒學習緊,都唔緊要,要比機會人地學,先可以keep住食到好野。第二碟有燒鴨乳豬飯,依份叫左少飯嘅,但都仍然好豐富,乳豬皮係脆嘅,但有少少細骨係底,做唔到啖啖肉效果。燒鴨都幾好,帶有啲肥,香口好食,唔會乾。仲有啲醬點下,減輕油膩感。依張相好見到唔叫少飯嘅份量係幾多。最後仲食埋個乳鴿,幾有水準。店舖話係生炸,我都覺,因為係毎一啖都有啲肉汁油份浸出黎,皮都炸得幾香口,用手黎食真係爽。野飲叫左甘草菊花蜜,夠哂凍同大杯,好飲。最後店舖嘅侍應雖然好忙,但對食客都有傾有講,幾好態度,絕對係街坊選擇之一。