一坐低個蒸氣鍋已經「嘟嘟聲」準備好，第一轉梗係要試佢嘅主打—生蠔同蟶子！佢哋嘅生蠔唔係講笑，隻隻都大隻飽滿，放落去蒸嘅時候已經聞到陣陣海水嘅鮮味。蒸熟一打開，嘩！隻蠔脹卜卜，一啖隊入口，蠔汁「噗」一聲爆出嚟，鮮甜到不得了！完全冇渣，個種嫩滑口感真係食到唔停得口！
至於蟶子，同樣係驚喜之作！每隻都係XXXL size，肉質厚身到呢！蒸完之後唔會縮到唔見影，咬落去爽脆彈牙，鮮味十足，完全冇沙，淨係點少少蒜蓉豉油已經將鮮味推到頂點！佢哋嘅海鮮品質真係冇欺場，食多幾轉蠔同蟶子，個成本已經返晒嚟啦！
食完一輪原汁原味嘅蒸海鮮，個底已經鮮甜到不得了，跟住就係打邊爐時間！用返蒸完海鮮嘅精華做湯底，淥咩都特別好味！
成晚食落嚟，蒸+火鍋兩食，真心覺得性價比超高！環境坐得舒服，服務都幾爽手，不停幫我哋換碟同加單。雖然話係放題，但佢哋完全冇將貨就價。
溫馨提示：記住訂定位呀，我哋平日夜晚去都全場爆滿，就知有幾受歡迎！
