阿嫲現烤手工蛋糕 (已搬遷) 新店位置

是咁的，因為太子真係好多間古早味蛋糕店， 對於一直想試嘅我實在眼花撩亂，於是朋友介紹話呢間係勁好食，我就試下。見到舖面寫住，唔同蛋糕有唔同嘅出爐時間，我就知道，要食咩味係靠緣分，我咁啱去到，得番原味，朱古力味同班蘭味我買咗班蘭味試下~ 店主介紹話花生酥都好好味，我又買咗一盒，因為屋企老人家好鍾意食呢啲唔健康嘢店主好好幫我將班蘭蛋糕切件，一條有七至八件，切完之後拎俾我睇嗰一刻，成陣班蘭味好香，我帶住口罩都聞到 !返到屋企，即刻拎咗兩件食，食落口好鬆軟，好香蛋味，用嘅雞蛋係高級嘢~因為鋪面電視有佢哋嘅蛋糕介紹，話係用日本新紀元雞蛋去做，所以咁香蛋味 !最搞笑係，唔食甜嘢嘅老母，竟然都食咗兩件班蘭蛋糕~ 因為真係好好味，唔甜但係好香雞蛋味， 好似將蛋糕嘅原味，完完整整地呈現出來。充滿古早味，可能就係呢一種。至於花生酥， 個人覺得不過不失，但係老人家好鍾意食，話唔油膩，好酥脆。