瀛風 (啟田市場) (已結業)

星期日一早去咗藍田超市入貨，之後就喺樓下翻新咗嘅市集買午餐。各式小食店同飲品店都有，但天氣仲係好熱☀️，所以我決定買日本嘢食，感覺無咁㷫烚烚，幫襯咗「瀛風 」。小店做外賣為主🥡，舖面唔大，但都有幾個年輕哥仔喺到做廚，落心落力。有別於好多其他小店只賣壽司刺身，呢度仲有唔少熟食賣，例如炸物同咖哩飯等。由於食物係即叫即整，所以要預番起碼十分鐘等候時間。不過新鮮熱辣辣整起更吸引，我拎到返屋企食仲係熱的👍。我買咗二百蚊食物，三份人食。望落好似唔係好多嘢食，點知食完超飽🙈，仲淨咗個手卷留番宵夜食。既然小店係🍣壽司手卷專門店，點都要嗌番件試下嘅。我要咗炙燒芝士三文魚手卷($18)同炸軟殼蟹手卷($26)，兩個都係巨無霸份量，飯超多，餸亦都唔少。當我哋拆開膠袋包紫菜時，更加見到小店出手唔孤寒，三文魚同軟殼蟹唔係得面頭有，而係去到手卷差唔多尖錐嘅位置都有料。🦀軟殼蟹炸得幾香脆，而且仲落埋沙律醬一齊食，好惹味。不過炙燒三文魚雖然係多芝士，但個人覺得爭緊啲沙律醬，唔夠濕。咖哩流心芝士豬扒烏冬($57+$6)，原來咖哩、流心芝士豬扒同烏冬係三樣獨立分開上㗎😍。餐廳不計成本、重視食物質素，唔會求其將佢哋放埋一齊。