蕃滿門 (已結業)

今日食晏去左九展emax果邊搵下有無好野食，太耐無嚟先知原來二樓有個好大嘅food court, 有好多餐廳，都同樣有好多人。我地有四個人等張枱都等左十分鐘。坐低左就分批出去睇下食咩，行下行下見到呢間蕃滿門，都有好多人排隊買，望真啲，原來食蕃茄湯底嘅！就一於試下佢，我叫左個午餐蕃茄螺絲粉配雞扒加金菇肥牛卷，再配左個凍飲，接近要60蚊。等左5分10分鐘就有啦，個粉大大碗，雞扒都有兩塊，大食嘅朋友唔駛擔心，一定飽。但我揀左微辣湯底，其實都唔微，如果唔係好食得辣嘅朋友就小心啲，食翻原味最穩陣。