武士拉麵 (已結業)

其實係附近食晏已經留意到呢間拉麵店，見都幾多學生哥幫襯。所以收左工就決定過黎會一會佢。雖然呢度鋪仔細細，但選擇都算多，有成十款拉麵可以揀，味道淡至濃逐級上。但因為晏晝嗰餐嘅關係，所以揀左個師傅仔都推薦，清新口味啲嘅，蕃茄豬骨拉麵$98，配多條蟹捧+$12。個拉麵一上枱，必定係試左個湯先。湯頭好決定拉麵嘅好壞，呢度做得幾好。我點嘅係偏淡嘅蕃茄湯底，咁樣唔會搶左豬骨湯同埋叉燒嘅味道。微微酸甜味，幾醒胃。呢度嘅蟹棒係有誠意嘅貨色，一梳梳嘅效果同味道都唔錯而麵就同師傅仔講嘅一樣，粗麵會有少少偏硬。配合啖湯底出黎嘅效果就啱啱好，可以吸多啲湯汁。溏心蛋就老左啲，蛋黃熟左少少。反而叉燒就啱啱好了，軟熟得黎仍有咬口。雖然唔算入味，但保留到少少肉香。之後見佢個特製魚油咁有信心推薦，就攞左啲黎試雖然寫係俾魚介麵用嘅，但我覺得淡味嘅湯底都可以試下，因為佢呢個胡椒溝芝麻油嘅組合真係幾香，有刺激味蕾嘅效果。最後追加左個薑蜜，再暖一暖身先離開以便抵抗今晚呢個氣溫急降嘅日子。