新蒸武門 (已結業)

好耐以前食過佢地既午市套餐覺得唔錯，今次晚餐唔想食到咁油膩就揀左佢啦。晚餐有散叫，亦有二、三、四同六人餐揀。套餐有已經配搭好既，你亦可以自選組合😜。今次K揀既二人餐($420)就可以係菜類、海鮮類同肉類各選一碟啦😆如果人數多啲，就可以揀埋小食。佢地既菜式種類選擇都幾多款嫁，今次二人餐就揀左紅棗杞子浸時蔬(菜)、龍躉球蒸豆腐(海鮮)、香菇北茋銀山焗雞(肉)同埋套餐都會包兩盅燉湯同白飯～首先一到餐廳，店員就會為你倒上八寶茶，有菊花、圓肉、紅棗、杞子等，飲落有陣陣清香。個燉湯係姬松茸螺片燉雞😋真係完全係重點來😌放係枱面影相既時候，雞既香味已經係咁飄過黎😁加埋姬松茸、准山等一齊燉，夠足料味道好濃郁，加上無落味精，飲完都唔會覺得口渴，覺得自己勁健康🤣紅棗杞子浸時蔬係娃娃菜上面加埋冬菇片，食落幾香～龍躉球蒸豆腐用左鼓汁去蒸，龍躉魚肉厚身得黎都夠嫩滑😝而且好索汁！豆腐係百福豆腐果種，所以好滑溜😚仲有香菇北茋銀山焗雞，店員送上枱之後先會打開錫紙，加左紅棗、冬菇、金菇、蔥花一齊包住黎蒸，所以雞件都好入味，個底仲有粉絲用黎索哂啲精華。其實款款菜式份量都好多，連埋飯吖湯吖咁，真係都夠三個人食😝