緣味小聚 (金百利廣場) (已結業)

海鮮控的我們，聞風而至來到位於銅記金巴利七樓嘅『緣味小聚』。我哋叫咗218蚊一位嘅鮑魚海鮮餐，個餐有韓國大鮑魚，真係好大隻，蒸完仍然够大，店主仲好細心幫我哋整走D唔吃得嘅内臟，抵讚；仲有蘇格蘭聖子皇，唔係太大隻，但够鮮，够甜；北海道大刀貝也是煙煙韌韌有嚼口；另外三種貝類亦係新鮮貨色，唯獨呢一刻睇番D相，好似没有蝦，唔記得冇影到或者店家漏咗呢，好混亂吖。不過好彩碗靚湯同埋自選八寶飯補番數。八寶飯係喺30種配料揀選8樣來蒸飯，需時18分鐘。有蝦酱豬腩肉，半脷，牛肉粒，潤腸，芋頭，南瓜，雞軟骨，豬頸肉，有齊豬，牛，雞，菜，實在太豐富，太好味。