潮福蒸氣石鍋 (已結業)

剛剛先話有三個月無食過海鮮，頭先系度清理相片先知原嚟上個月1號同個老友去撐過臺腳，上次都食左唔少，一邊寫一邊吞口水，下個月仲要去食多次先得。首先就梗系整個粥底先喇，我地選左排骨南瓜粥，南瓜到最后煲出嚟會好香，最后吸收曬D海鮮鮮味，可以講食咁多海鮮有一半系為左呢個重頭戲，南瓜食到尾聲都煲爛曬，米又化曬，軟綿綿又香甜，簡單就系成晚嘅壓軸之作。日本元貝大皇真系好大只，肉好厚，蒸五分鐘就可以食得喇，咁大舊肉一啖都咬唔曬，肉好緊結，夠厚身，所以口感好，好有滿足感，夠曬新鮮。蒜蓉蒸開邊龍蝦仔好抵食，有膏有肉，都算大只，而且最重要系肉質夠好，蒸幾鐘就得，蒜蓉好香，龍蝦仔新鮮爽口彈牙，蒸熟肉白雪雪，一睇就知新鮮，好Q彈，美味啊。花竹蝦比龍蝦仔要貴D，但貴得有價值，D蝦肉真系鮮甜無比，肉質好靚，好緊致又好彈牙，會令人覺得系驚喜，蝴蝶蚌比蜆要大，所以肉都其他貝殼類嘅要多，同樣都系好新鮮肥美，肉都好清甜，好鮮。如果第一次嚟嘅或者人少嘅朋友仔可以點個套餐，都好抵食，食過就會想嚟第二次喇。