緣味小聚 (金百利廣場) (已結業)

天氣開始轉凍，係時候要食啲暖笠笠既野。我同女朋友去緣味小聚度食蒸氣邊爐。先黎既係六小時燉原盅絕無味精原盅燉湯，用料十足，有雞腳，蓮藕，瘦肉，火喉十足，好潤喉。我地叫左星級大鮑魚餐，裏面有星級海鮮八款，包括韓國大鮑魚，蘇格蘭蟶子皇，紐西蘭大貴妃蚌，愛爾蘭大刀貝，深海龍躉件，生猛大海蝦，青島大花蛤鮮甜貝殼類，手切星級牛小排。海鮮非常鮮甜，肉質鮮嫩，又大隻。我個人黎講比較鍾意蟶子，點埋醬汁，非常惹味。值得一提係佢個鮑魚，非常有肉地，唔韌，好juicy。 店員會幫忙蒸啲食材，有timer計時間，所以時間啱啱好。牛小排好鮮嫩，入口即融。另外仲有豐盛八寶蒸飯 (24款蒸飯配料選8款)。我地要左蝦醬豬腩肉，榨菜梅頭肉，醬油漬牛脷，臘腸，蓮藕，蒜香茄子，菠蘿，豆醬豆腐卜。咁樣食蒸飯，自己選配料，都算係第一次，味道幾好，好有火花。