胡爐 (已結業)

究竟胡爐裏面買咩藥？同平時火鍋店唔同，走嘅係高級中式風。入到去冇嘈雜嘅環境，枱數唔多，換黎嘅係環境闊落，係打邊爐+ 談心嘅好地方。湯底款式多，最後點左胡椒花膠豬肚雞鍋，要養一養顏。鮮雞嫩滑，豬肚乾淨爽口。湯料分量十足，打足兩個鐘，仲有豬肚剩。胡椒味濃，隨手都有好幾粒胡椒粒。胡爐牛拼盤！有選擇困難症 + 食牛獸必食！一個拼盤有齊牛舌心、安格斯手切肥牛、牛胸爽、牛頸脊同霜降牛粒。當中對牛胸爽最感興趣，見佢白雪雪，一開始以為係脂肪，原來係牛胸肋骨中間的軟骨部位。食落好爽口，好重牛味。安格斯手切肥牛焯幾焯就食得。霜降牛粒雪花靚，入口柔軟。黑松露蟹肉餃，好濃嘅黑松露味，甚至濃到隔離個fd食我都聞到。上方係皇帝柱貝墨魚丸，真係有食到成粒嘅柱貝，用料唔馬虎下方係芝士蝦丸，係新鮮蝦膠包住芝士粒。食嘅時候會爆醬嘅芝士，要小心！蝦膠本身都彈牙。自家製響鈴大大件，厚身，建議比一般嘅焯多陣，就更吸湯。由於較厚身，更容易控制時間，做到外面吸湯，入面個層仲做到少少脆嘅口感。整體黎講，食物尤其丸係有心思。冬天活動好似咁樣一路慢慢食好西，一路吹水，都係一個好選擇。