名門私房菜

营业中

休息中

今晚捐窿捐罅俾我搵到呢一間私房菜，嘢食好正，唔單止食材新鮮，而且煮法又考究。白汁燉白肺湯-首先處理白肺已經好考功夫，再白鑊後燉湯，一啲腥味都冇，反而杏仁咪出眾，湯帶稠滑順喉，十分滋潤。冰鎮鮑魚配燒汁芥辣醬-鮑魚口感軟腍，配醬汁夠惹味。鑲鑽黃金蝦-鹹蛋黃足料，而且係用燕麥去做外層，減退油膩口感，而且唔會食到厚粉漿。而且大蝦肉質新鮮彈牙。生煎鯪魚餅-打到鯪魚餅起晒膠，而且無咩碎骨，咬落啖啖魚肉。砵酒焗桶蠔-蠔身肥厚，薑蔥惹味。古法瓦罉豉油雞-一上枱就見豉油汁卜卜卜卜的，玫瑰露酒嘅香味直撲入鼻，入口甜甜地，雞肉就非常嫩滑，讚！上湯浸時蔬-菜心鮮甜，而且帶有少少金華火腿香。招牌名門炒飯-好足料，炒得又夠乾身。薑湯煲番薯糖水-薑味適中熱辣辣上枱，多番薯，係標準甜度。總括食材新鮮，而且煮法考究，好啱家庭聚會，下次再試其他菜式。