潮食地

今日lunch time 放飯同同事唔知食乜好，見到有間茶餐廳望落去好似幾正就入左去試吓。入面環境都企理乾淨，坐位都闊落唔會坐到好迫。 職員即使喺lunch time 咁忙都唔會催你落單，同埋都好有禮貌，上菜速度又快，好適合啲想食個快飯嘅打工仔。

蔥油豬扒蛋飯
豬扒煎得好好同醃得好入味, 豬扒好淋無筋, 豬扒食落去都冇雪藏味, 配埋煎蛋嘅蛋黃汁同好香嘅蔥油非常送飯。

滑蛋蝦仁飯
滑蛋蝦仁飯嘅滑蛋份量好多，隻蛋煮得唔會太熟，食落去好嫩滑，食到中段都唔會變到好鞋口，蝦仁份量都好多，唔會得幾隻，配合埋豉油送飯真係好鬼正。

熱奶茶，熱檸水
熱奶茶夠香夠滑係水準以上！熱檸水佢哋用靚檸檬，浸耐咗都唔會有澀味，雖然係好基本嘅嘢飲，但係都唔係好多茶餐廳做到呢個水準。