星巴克咖啡 (已結業)

2016年未過一星期，「星巴克咖啡」已有兩款新搞作 ，分別為「栗香松露白朱古力咖啡」及「草莓紅絲絨朱古力咖啡」。一如以往，星巴克綠星級或金星級會員於特飲推出首週內可享免費升級優惠 。XO仔對栗子敏感，而且近年愛上咗士多啤梨，唔洗諗當然係揀飲「草莓紅絲絨朱古力咖啡」啦！第一日自己口快快，叫錯咗杯熱飲 ，感覺好似飲緊杯甜甜o既草莓味咖啡咁，冇乜特別，原本都冇打算寫食評。不過第二日叫返杯星冰樂，無論係口感定味道都差好遠，所以就決定要喺OpenRice度讚賞吓 。「草莓紅絲絨朱古力咖啡星冰樂」底層又脆又軟o既質感勁似芝士蛋糕連少少批底，同杯內醇濃o既朱古力咖啡極為相襯，加上面層香滑o既芝士忌廉同草莓脆粒點綴，差啲仲以為自己喺度飲緊個芝士蛋糕落肚咁，清新、美味又醒神，而且仲好有節日氣氛添 ！