名捌月 (已結業)

同成班朋友去開荃灣，見到呢間名捌月，應該係改咗名再營業，入去見到都有一半滿就試試。我地5個大男人當然會叫多啲，一人叫一個主菜再叫啲肉同小食 share 下咁。本人一向對意粉同牛扒都好高要求，特别係牛扒，難食嘅真係會燥到爆。見佢有個松葉蟹膏蟹肉意粉好似幾吸引，所以我自己揀呢個，另外再叫份日本雪降西冷 share 黎試試。意粉到時 shock 咗下，佢係連成個蟹蓋上，賣相係幾好，食落真係好味，蟹肉味夠，意粉唔會太淋，個汁入曬味，真心推介，會成為我食過意粉頭3位。個牛都好正，入口即溶，不過真係要襯熱食先，切咗有兩件掛住吹水放耐咗真係冇咁正，個牛價錢唔算平但質素算係咁，唔會話嘥錢。班朋友仲有叫咗蜆肉意粉，豬手同黑松露薯條，薯條好食嘅，不過食到底就冇乜松露，建議食前攪攪佢。豬手又係一絕，皮夠脆，肉唔會好硬，少少唸口好有口感，加埋佢個芥辣汁應該係自家調，成件事同個牛有得揮。蜆肉意粉我冇食所以冇得評，但朋友話都不錯，下次會試試。個牛唔記得影但真心正。絕對會 book mark 再去。