亞萊嘜嘜 (已結業)

午飯去到荃灣揾食，見到千色店隔離有新既餐廳開左，上到嚟3樓先知道係泰菜，非常驚喜，因為荃灣唔係咁多泰菜食！餐廳地方闊落，適合聚腳，午飯時間餐牌食品選擇多，小食，飯麵，湯粉，甜品都有！而且價錢都幾實惠，加少少錢仲可以叫埋小食！我就叫左個豬脾拼海南雞飯食，豬脾嫩滑，軟稔！滷水汁非常入味！肥瘦適中！ 加埋d 酸菜，酸酸甜甜，非常開胃！海南雞亦都十分嫩滑，啖啖肉，配上葱油同辣汁，食多幾件都無問題！食完飯之後我哋叫左兩樣甜品share食，就係椰汁糕同我既泰式甜品至愛椰汁糯米飯！先講椰汁糕十分足料，除左面頭既椰汁外，入面仲有芋頭，粟米，西米等等食材，而且非常新鮮，唔會雪到乾'爭爭'!再講個糯米飯，用左黑白糯米再加個好甜既芒果，賣相已經吸引，而且椰汁味濃郁，糯米本身都已經甜，加埋椰汁同芒果，真係甜到入心入肺！色香味俱全！兩個人埋單2百幾，食左咁多野又真係Ok ,下次想喺荃灣食泰菜，又多個好選擇！