紅磡冰室 (已結業)

由元朗特登出去北角睇音樂劇，本來諗住去食漢堡包，結果出到去已經太晏趕唔切去食漢堡包，惟有搵間茶餐廳快快脆脆食個lunch。見到呢間茶餐廳又近新光大劇院，而且又即刻有位，於是即刻入左去食啦。叫左兩個常餐，有多士又有滑蛋，又有撈丁都幾多野食，重點係茶餐廳一定係快，食完應該仲有時間剩。瑞士雞翼瑞士汁撈丁一入餐廳已經見到有幾枱客食緊，無理由唔試下嘅。果然無令我失望，雞翼亦都好入味。當然，撈丁只要個麵煮得軟硬適中，加埋個汁又真係好少會出事，呢個丁麵當然味道唔錯。雖然話即食麵食得多唔係咁健康，不過入得嚟茶餐廳就唔好諗呢d野喇！另一個餐揀左豬扒撈丁，豬扒好大塊好吸引，豬扒亦唔覺得乾！味道都唔錯，塊豬扒大到可以遮住左成個麵餅。豬扒撈丁味道無瑞士雞翼撈丁咁濃味，我個人覺得唔錯。最後快快手手食完野準時趕到去睇音樂劇，一切盡在掌握！茶餐廳果然係趕時間嘅恩物。